Wednesday, November 5, 2008
عصفوري
عصفورى يا متغرب عن بلادك مالك
لا انت قادر تقرب ولا بيتغير حالك
عصفورى ايه غيرك ايه بس شاغل بالك
مستنى الزمان ينصرك والدنيا تحلالك
يا عصفورى البرىء يا للى السنين سجناك
وحدك من غير رفيق مغلوب هنا وهناك
يا عصفورى اللى ضاع ياللى الحياه ظلماك
لو كان الحنين يتباع ايه بس كان بكاك
يا عصفورى اللى تاه صعب الطريق تلقاه
انساه بقى انساه مستنى ايه وياه
يا عصفورى الجريح انسى العذاب والاه
عشك دا طار فى الريح وكان الدفا جواه
عصفورى جرب طير بين الدروب وطوف
ياللى انت دوقت كتير وقضيت حياتك خوف
افرد جناحك روح لف الجناين شوف
ما تنامش يوم مجروح او ع الوليف ملهوف
يا عصفورى انت حر والدنيا بتناديك
فوق عمرك احلم بعمر الحلم ملك اديك
عصفورى يا متغرب عن بلادك مالك
لا انت قادر تهرب ولا بيتغير حالك